Ботир МАДИЁРОВ/«Халқ сўзи». Қўқон шаҳрида бўлиб ўтган Ўзбекистон – Венгрия ҳудудлараро биринчи халқаро форумда қатнашган Венгриянинг Яс-Надькун-Сольнок вилояти президенти Имре Хубай, ижрочи ҳокими Аттило Берко бошчилигидаги делегация Риштон туманида ҳам бўлган эди.

Қардош юрт вакиллари тумандаги «Мингбоши керамик» кулолчилик музейида бўлиб, кулолчилик маҳсулотлари кўргазмаси билан танишди. Шунингдек, меҳмонларга ҳар бир маҳсулотни тайёрланиш жараёни кўрсатиб берилди.

Музейдаги мураккаб ҳамда нафис нақшлар, ўзига хос услубда яратилган, табиат манзаралари туширилган турли кўринишдаги сержило идишлар ҳамда кулолчилик буюмлари кўҳна қитъа вакилларига жуда манзур бўлди.

—Меҳмонлар фаолиятимиз билан танишиш асносида риштонлик кулоллар билан кенг қамровли ҳамкорликка тайёр эканини маълум қилди,—дейди «Чинор плюс» кулолчилик ва туризм мажмуаси раҳбари Ислом Орифжонов.

Юзма-юз мулоқотлар сўнггида Яс-Надькун-Сольнок вилояти президенти Имре Хубай Риштон тумани ҳокимлиги делегациясини кейинги йили Венгрияда ўтказиладиган нуфузли халқаро форумга таклиф этди.