Mineral oʻgʻitlar bozorida narxlarni asossiz oshirish holati boʻyicha “Maxam-Chirchiq” AJga nisbatan ish qoʻzgʻatildi. Bu haqda Raqobat qoʻmitasi xabar berdi.

Maʼlum qilinishicha, Qoʻmita tomonidan “Maxam-Chirchiq” AJda ishlab chiqarilgan mineral oʻgʻit mahsulot narxlarini shakllantirishda amaldagi normativ hujjatlarga rioya etilmaganligi natijasida mahsulot narxlarining asossiz oshishiga olib kelgan harakatlar alomatlari aniqlangan.

Natijada, mineral oʻgʻit mahsulotlari narxlari oʻrtacha 10 foizdan 15 foizgacha oshishiga sabab boʻlgan.

“Yuqoridagilarga koʻra, Raqobat qoʻmitasi tomonidan “Maxam-Chirchiq” AJga nisbatan “Raqobat toʻgʻrisida”gi qonun talablari buzilishi alomatlari boʻyicha ish qoʻzgʻatildi”, deyiladi xabarda.

Qoʻshimcha qilinishicha, ushbu omil qishloq xoʻjaligi korxonalari (klaster, fermer, dehqon va boshqalar)ga bevosita taʼsir qilib, qishloq xoʻjaligi mahsulotlari narxlari oshishiga olib kelishi mumkin.