Qarshi davlat texnika universitetida Oliy Majlisning Inson huquqlari boʻyicha vakili (Ombudsman)ning Qashqadaryo viloyatidagi mintaqaviy vakili tashabbusi bilan “Ombudsman maktabi” loyihasi doirasida huquqiy targʻibot tadbiri oʻtkazildi.

Tadbirda maʼruzachilar inson huquq va erkinliklarini taʼminlash yoʻnalishida mamlakatimizda amalga oshirilayotgan ishlar, yaqin yillarda qabul qilingan muhim huquqiy hujjatlar hamda ularning asosiy mazmun-mohiyati toʻgʻrisida atroflicha maʼlumot berdilar.

— Dekabr oyini haqli ravishda huquqiy targʻibot oyligi deya olamiz, — deydi Ombudsmanning viloyatdagi mintaqaviy vakili Lola Saodatova. — Chunki bu oyda inson huquqlariga doir qator muhim sanalar bor. Xususan, 8-dekabr — Konstitutsiya qabul qilingan kun, 9-dekabr — Xalqaro korrupsiyaga qarshi kurash kuni, 10-dekabr — Xalqaro inson huquqlari kuni. “Ombudsman maktabi” loyihasi ham ushbu sanalar munosabati bilan korxona va tashkilotlar, taʼlim muassasalarida huquqiy targʻibot tadbirlarini amalga oshirib kelmoqda.

Loyiha doirasida shu kabi maʼrifiy uchrashuvlar viloyatning bir qator oliy taʼlim muassasalarida ham tashkil etildi.

Jahongir BOYMURODOV, “Xalq soʻzi”.