Foto: Samarqand viloyati hokimligi

Pardayev Jamshid Arziyevich Samarqand viloyatining Pastdargʻom tumani hokimi etib tasdiqlandi. Bu haqda viloyat hokimligi matbuot xizmati xabar berdi.

Maʼlum qilinishicha, bugun, 3-fevral kuni Xalq deputatlari Pastdargʻom tumani Kengashining navbatdan tashqari sessiyasi oʻtkazilgan. Unda Samarqand viloyati hokimi soʻzga chiqib, tuman salohiyati, iqtisodiy imkoniyatlari, keyingi yillarda xalq xoʻjaligining turli sohalarida erishilgan yutuqlar hamda yechimini kutayotgan muammolar haqida gapirgan.

Shundan soʻng, sessiyada tashkiliy masala koʻrilib, Sh.Rahmonov oʻz arizasiga koʻra, Pastdargʻom tumani hokimi vazifasidan ozod etilgan.

Shu paytgacha Pastdargʻom tumani hokimining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari – Iqtisodiyot va moliya boʻlimi boshligʻi vazifasida faoliyat koʻrsatgan Pardayev Jamshid Arziyevich Pastdargʻom tumani hokimi etib tasdiqlangan.

Sessiyada tumanni ijtimoiy-iqtisodiy rivojlantirish borasidagi muhim vazifalar ham belgilab olingan.

Eslatib oʻtamiz, avvalroq Mahmudov Temur Asomidinovich Samarqand viloyatining Oqdaryo tumani hokimi etib tayinlangani haqida xabar berilgan edi.