Oʻzbekiston milliy terma jamoasi va Fransiyaning “Lans” klubi himoyachisi Abduqodir Husanov transferi uchun kurashga Ispaniyaning “Real Madrid” klubi ham qoʻshildi, deb xabar bermoqda “Fichaches” nashri.

Manbaga koʻra, Real Madrid oʻzining markaziy himoyasini kuchaytirish uchun bir nechta oʻyinchilarni kuzatmoqda. Karlo Anchelotti jamoasini kuchaytira oladigan futbolchini izlash skaut Xuni Kalafatga ishonib topshirilgan.

Abduqodir Husanov taxminan 20 million yevroga baholanmoqda. “Lans”ning asosiy oʻyinchisi “PSJ” hamda APLning bir nechta yirik klublari eʼtiborini ham jalb qilgan. Koʻrinishidan, bu keskin kurash “Manchester Siti” va “Real Madrid” oʻrtasida boʻlishi kutilmoqda, deyiladi xabarda.

“Abduqodir oʻz pozitsiyasida Yevropaning eng yaxshi futbolchilaridan biri ekanini allaqachon isbotladi. U yosh va har kuni kuchayib bormoqda. U Yevropaning eng yaxshi klublarida oʻynashga loyiq. Bizning «Lans” bilan juda yaxshi munosabatlarimiz bor, klub ham futbolchi uchun eng yaxshi tanlovni amalga oshirish tarafdori. Agar transfer muvaffaqiyatli amalga oshsa, klub yosh futbolchiga ishonch bildirgani uchun munosib mukofot oladi», deydi futbolchining vakili Gʻayrat Xasbiullin AS gazetasiga bergan intervyusida.

Eslatib oʻtamiz, Abduqodir Husanovni Madrid jamoasiga jalb qilish vazifasi yuklatilgan Xuni Kalafat jahon futbolida katta nomlarni kashf qilgan shaxslardan biri sanaladi.

U Vinisius, Valverde, Rodrigo, Kamavinga va Arda Guler singari futbolchilarni topgan va klubga olib kelishda asosiy vazifani bajargan.