Foto: Prezident matbuot xizmati

Prezident Shavkat Mirziyoyevning Qoraqalpogʻistondagi tadbirkorlar bilan ochiq muloqotida yiliga 250 trillion soʻmdan ziyod davlat xaridlari amalga oshirilayotgani qayd etildi. Shu bois, davlat xaridlarida mahalliy mahsulotlar ulushini oshirish vaqti kelgani taʼkidlandi.

Kelgusi yilgi davlat investitsiya dasturidagi har bir loyiha boʻyicha mahalliy mahsulotlar ulushi qancha boʻlishi aniq belgilanadi. Davlat xaridida endi mahalliy mahsulot ulushini oshirish ragʻbatlantiriladi.

Jumladan, energetika, neftgaz, kimyo, metallurgiya, temir yoʻl kabi tarmoqlardagi yirik korxonalar 2-3-yillik buyurtmalarini kooperatsiya portaliga oldindan joylashtiradi.

Mahalliy korxonalar esa ushbu buyurtmalar asosida yangi turdagi mahsulotlarni ishlab chiqarishni yoʻlga qoʻyadi. Ularning loyihalariga dastlabki bosqichda 100 million dollar yoʻnaltiriladi.

Soʻnggi yillarda energetika sohasi isloh qilinib, xususiy sektorga keng yoʻl ochib berildi.

Bu orqali 3,5 milliard dollarlik xususiy sheriklik loyihalari ishga tushdi va yana 31,5 milliard dollarlik 50 ta loyiha boʻyicha ishlar jadal davom etmoqda.

Hududiy elektr tarmoqlarining boshqaruvini xususiy sektorga berishda amaliy bosqich boshlanadi. Xususan, oktyabrda Samarqand viloyatidagi elektr tarmoqlariga xususiy operator jalb qilish boʻyicha tender eʼlon qilinadi.

Kelgusi yil Jizzax va Sirdaryoda ham xuddi shunday ishlar amalga oshiriladi.

Yer osti boyliklarini oʻzlashtirishga tadbirkorlarni keng jalb etib, ishlab chiqarishni koʻpaytirish muhimligi taʼkidlandi.

Shu yilning oʻzidayoq 150 tadan ortiq kon va maydonlar tadbirkorlarga sotildi.

Yil yakunigacha yana 300 ta kon va maydonlar tadbirkorlarga taklif qilinadi.

Qurilishda qum-shagʻalga ehtiyojni qoplash maqsadida 110 million kub metr zaxirali 172 ta kon ham tadbirkorlik uchun ajratiladi.