Elchi Ravshan Usmanov Birmingem Savdo-sanoat palatasi prezidenti Nasir Avan bilan uchrashdi.

Muloqot davomida investitsiyaviy loyihalarni amalga oshirish, oʻzaro savdo va iqtisodiy hamkorlikni yanada rivojlantirish, ikki mamlakatda joylashgan maxsus iqtisodiy zonalar va sanoat parklari oʻrtasida tajriba almashish maqsadida oʻzaro tashriflarni tashkil etish masalalari muhokama qilindi.

Oʻzbekistonda ishlab chiqarilgan tovarlar va yetishtirilgan qishloq xoʻjaligi mahsulotlarining Birmingem bozorlariga eksportini kengaytirishga alohida eʼtibor qaratildi.

Muzokaralar yakunida ikki mamlakat ishbilarmon doira vakillari oʻrtasida B2B formatida uchrashuvlar tashkil etish va Britaniya kompaniyalari delegatsiyasining Oʻzbekistonga biznes missiyasini tashkil etish boʻyicha dastlabki kelishuvga erishildi.

Birmingem Savdo-sanoat palatasi 1813-yilda tashkil etilgan boʻlib, mamlakatdagi eng nufuzli tuzilmalardan biri hisoblanadi. Palata mintaqadagi kompaniyalarni qoʻllab-quvvatlash, rivojlantirish va xalqaro aloqalarni oʻrnatishga koʻmaklashadi. Ushbu tuzilma turli sohalarda faoliyat olib boruvchi 3100 dan ortiq yirik korxonalarni birlashtiradi.