12-14-mart kunlari Oʻzbekiston yoshlari Giyohvand moddalar boʻyicha komissiyaning (CND) 67-sessiyasi doirasida BMTning Yoshlar tashabbusi tomonidan tashkil etilgan yillik forumida ilk bor ishtirok etdi.

Tadbirda dunyoning 27 davlatidan 35 nafar yosh ishtirokchi qatnashib, unda giyohvandlikning oldini olish va yoshlar salomatligini mustahkamlash borasidagi muhim masalalar muhokama qilindi.

Yoshlar forumi dunyoning turli mamlakatlaridan kelgan yosh yetakchilarning oʻzaro fikr va tajribalarini almashish maydoniga aylandi. Oʻzbekistonlik ishtirokchilar yangi konsepsiya va tashabbuslardan qoyil qolishdi hamda turli mamlakatlardagi tengdoshlari bilan muloqot qilish imkoniyatidan bahramand boʻlishdi.

BMTning Giyohvand moddalar va jinoyatchilik boʻyicha boshqarmasi ijrochi direktori Gada Vali yosh yetakchilarni samimiy qutlab, ularni ushbu forumdan bilim olish va oʻzaro muloqot qilish uchun foydalanishga undadi. Siyosat tahlili va jamoatchilik bilan aloqalar boʻlimi direktori Jan-Lyuk Lemaxe ham ushbu tadbirning yoshlar tashabbuslarini rivojlantirishdagi ahamiyatini alohida taʼkidladi.

Oʻzbekiston yoshlarining forumda ishtirok etishi Barqaror rivojlanish maqsadlariga muvofiq yanada sogʻlom va xavfsiz jamiyat yaratishga hissa qoʻshadi. Bu, shuningdek, yoshlarning global muammolarni hal etishda faol ishtirok etish, umumiy maqsadlarga erishish uchun tajriba almashish istagini yana bir bor tasdiqlaydi.