Foto: Xalq soʻzi

Oʻzbekiston Respublikasi Konstitutsiyasining 31 yilligi Buxoro shahridagi 24-“Nurli maskan” ixtisoslashtirilgan maktab-internati jamoasi va oʻquvchilari yodida bir umr qoladigan boʻldi. Bayram arafasida koʻzi ojiz oʻgʻil-qizlar tahsil oladigan bilim maskanining yaqinda qurib bitkazilgan yangi oʻquv binosi foydalanishga topshirildi.

— Asosiy qonunimizda nogironligi bor boʻlgan fuqarolarning ham boshqalar bilan teng tarzda oʻqishlari, oʻz salohiyatlarini yuzaga chiqarishlari uchun shart-sharoitlar yaratilishi kafolatlab qoʻyilgan, — deydi maktab-internat direktori Madamin Aslonov. — Bilim maskanimizda oʻgʻil-qizlarni har tomonlama barkamol etib tarbiyalash uchun davlatimiz tomonidan bajarilayotgan ishlar shu qonunning amaldagi ifodasidir. 13 milliard soʻmdan ziyod mablagʻ evaziga barpo qilingan 324 oʻrinli oʻquv binosi, 200 oʻrinli yotoqxona, 100 oʻrinli oshxona jamoamiz uchun bayram tuhfasi boʻldi.

Maktab-internat shu paytga qadar faoliyat yuritgan bino 160 oʻquvchi oʻrniga moʻljallangan, yotoqxona esa 100 oʻrinli edi. Bu esa turki tumanlardan kelib tahsil olayotgan oʻquvchilarga ham, oʻqituvchilarga ham noqulayliklar tugʻdirayotgandi. Endilikda bu masala kun tartibidan tushdi. Bilim dargohi moddiy-texnika bazasi mustahkamlanayotgani esa oʻgʻil-qizlar iqtidorini yuzaga chiqarishda yangi imkoniyatlar eshigini ochmoqda. Jumladan, Shvetsiyadan 160 million soʻm miqdoridagi mablagʻ evaziga brayl yozuvli printer xarid qilindi. Respublikamizda sanoqli sanalgan bu uskuna vositasida oʻquv qoʻllanmalari, zarur adabiyotlar, shuningdek, iqtidorli yoshlarning ijod namunalarini brayl yozuvida chop etish imkoniyati yaratildi.

Istam IBROHIMOV, “Xalq soʻzi”.