“Telegram” investorlarga Pavel Durovning hibsga olinishi kompaniya faoliyatiga taʼsir qilmaganini maʼlum qildi. “Financial Times” nashrida mavjud 2024-yilning birinchi yarmidagi moliyaviy natijalar kompaniyaning oʻsishini tasdiqlaydi.

2024-yilning birinchi yarmida “Telegram” 335 mln dollar sof foyda oldi. Bu butun 2023-yildagi 173 mln dollar zarardan keskin farq qiladi. Ushbu davrda daromad 190 foizga oʻsib, 525 mln dollarni tashkil etgan.

2024-yilning birinchi yarmida kripto-aktivlarning qiymati ham 2023-yil oxiridagi 400 mln dollardan 1,3 mlrd dollargacha koʻtarildi. Bunda “Toncoin” sotuvidan kelgan mablagʻlar “moliyaviy zaxira” yaratish imkonini bergan.

Eng qizigʻi, mablagʻlarning deyarli yarmi — 225 mln dollar nomaʼlum kompaniya bilan tuzilgan bitimga toʻgʻri kelgan. Buning natijasida “Toncoin” reklamani sotib olishning eksklyuziv usuliga aylangan. Shartnoma esa 2024-yil 1-oktyabrida bekor qilingan.

Bundan tashqari, reklama daromadi 120 mln dollar, “Premium” obunasi daromadi esa 119 mln dollargacha koʻtarildi.