Viloyatning toʻngʻich oliygohi – Namangan Davlat universiteti professori Narimon Dehqonov taʼlim-tarbiya sohasining fidoyisi boʻlishi bilan bir qatorda faol jamoatchi sifatida koʻpchilik hurmatiga sazovor boʻlgan. Yurt ravnaqi yoʻlida astoydil ish olib borib, yoshlar ongida mustahkam fuqarolik pozitsiyasini shakllantirish borasida tashabbus koʻrsatib kelayotgan bu insonning mehnati yana bir bor eʼtirofini topdi. Izlanuvchan muallim oliy taʼlim, fan va innovatsiyalar vazirligi huzuridagi Talaba va oʻquvchilarning ijtimoiy faolligini oshirish markazi tomonidan tashkil etilgan “Islohotlar bilimdoni” respublika koʻrik-tanlovining final bosqichi gʻolibiga aylandi. Mamlakatning turli hududlaridan sara ishtirokchilar qatnashgan ushbu nufuzli tanlovda N. Dehqonov “Eng faol milliy gʻoya va maʼnaviyat targʻibotchisi” nominatsiyasi boʻyicha faxrli 1-oʻringa loyiq topildi.

- Xalq deputatlari viloyat Kengashi deputati Narimon Dehqonov ilm-fan, maʼnaviyat targʻibotchisi va halol siyosatchi sifatida koʻpchilikka tanilgan, — deydi respublika maʼnaviyat va maʼrifat markazi viloyat boʻlimi rahbari Musoxon Oppoqov. – U yoshlar ongida mustahkam fuqarolik pozitsiyasini shakllantirishdagi ishtiroki, milliy qadriyatlarimizni eʼzozlash borasidagi saʼy-harakatlari bilan boʻlimimizning faol koʻmakchilaridan biriga aylangan.

Mamlakatimizda amalga oshirilayotgan hayotbaxsh islohotlarni keng ommaga yetkazish jonkuyarlaridan biri boʻlgan faol targʻibotchining yutugʻi nafaqat u ishlayotgan oliygoh jamoasi, balki butun Namangan ziyolilari koʻnglini shod etdi.

Qudratilla NAJMIDDINOV, “Xalq soʻzi”.