Oʻqituvchi va murabbiylar kuni oldidan davlatimiz rahbarining taʼlim sohasi xodimlari bilan oʻtkazgan videoselektor orqali muloqotida Toʻraqoʻrgʻon tumanidagi 37-umumtaʼlim maktabining ingliz tili oʻqituvchisi Nodira Nabiyeva ham faol ishtirok etdi.

Yosh boʻlishiga qaramasdan katta yutuqlarga erishgan iqtidorli qiz talabalik davridan respublika olimpiadalari gʻolibi, Navoiy nomidagi stipendiya sohibi boʻlgan. Uning 50 ga yaqin ilmiy maqolalari xalqaro jurnallarda chop etilgan. Tayyorlagan qoʻllanmasi esa Germaniyada elektron kitob sifatida nashr qilingan hamda AQSHning Gallodet universiteti tomonidan 5 ming dollarga sotib olingan.

Yaqinda “Eng maʼnaviyatli yosh oʻqituvchi” tanlovi gʻolibi boʻlgan N.Nabiyeva 15 million soʻm pul mukofoti bilan taqdirlangan edi. Ayni paytda u maktabda dars berish bilan birga 300 dan ortiq yoshlarga til oʻrgatmoqda.

Prezident sovgʻasi sifatida iqtidorli muallimaga zamonaviy avtomobil tuhfa etildi. Nodira Nabiyeva endi Ijtimoiy himoya milliy agentligida pedagog sifatida faoliyat yuritadi.

Qudratilla NAJMIDDINOV,

“Xalq soʻzi”.