Kim qanday kiyinishni istaydi,  milliy liboslarning qadriyatlarimizdagi oʻrni qay  darajada, zamonaviy moda  tushunchasining mohiyati nimada? Namanganda milliy va zamonaviy liboslar uygʻunligi targʻibotiga bagʻishlab oʻtkazilayotgan “Nafosat-2020” festivali kun  tartibidan oʻrin  olgan dastur tadbirlari  ishtirokchilari ayni mavzudagi  savollariga javob oldilar.  

Festival doirasida tashkil etilgan anjumanning birinchi kuni boʻlib oʻtgan  milliy va zamonaviy andozalarni chizish boʻyicha “Yosh dizaynerlar” tanlovida Namangan davlat universiteti, Namangan muhandislik texnologiya va muhandislik qurilish institutining 19 nafar iqtidorli talabasi oʻz mahoratini  namoyish etdi, Namangan ixtisoslashtirilgan madaniyat maktabi oʻquvchilari  esa  modalar koʻrgazmasini uyushtirdi. Viloyat tumanlaridan tashrif buyurgan tikuvchi va dizaynerlar ham oʻz mahsulotlarini koʻrgazmaga qoʻyishdi.

Bugun  viloyat markazidagi “Shodiyona” tantanalar majmuasida festival dacturidan oʻrin olgan navbatdagi tadbirlar davom etdi. Unda Andijondagi “Samo,” Fargʻona viloyatidan  “Molto caldo”, Namangan shahridagi   “Ideal”,   “Vakkoni”  brendlari  vakillari oʻz mahsulotlari taqdimotini oʻtkazdilar. Namanganlik yosh dizayner Munisa Zokirova ham oʻzi tayyorlagan milliy liboslar modeli bilan ishtirokchilarni tanishtirdi.

«Milliy liboslar-millat ziynati, qadriyatlarimizning ajralmas boʻlagi ekanligi festivalda yana bir bor isbotini topdi. Anjumanda oʻz chizmalari, milliylik va zamonaviylikni mujassamlashtirgan liboslari  bilan  qatnashgan iqtidorli dizaynerlarning izlanish  va intilishlari  tomoshabinlarning yuksak bahosiga sazovor boʻlgani  xalqimiz kiyinish madaniyatiga aslo  befarq emasligini koʻrsatdi. Anjuman davomida ayni  yoʻnalishdagi targʻibotni  yana-da kuchaytirish, milliy brendlarimizni xalqaro miqyosga olib chiqish yoʻl-yoʻriqlari belgilab olindi», deydi Oliy Majlis senati yoshlar, madaniyat va sport masalalari qoʻmitasi raisi Baxtiyor Sayfullayev.

Adrasdan tikilgan bejirim koʻylaklar, Chust doʻppisi, kishining egnida yarashib turadigan kostyum shim va boshqa kiyimlar modelini yaratgan dizayner, chokini qoʻldan chiqargan chevarlarning kasbiga mehri, barakali mehnatidan. Namanganda esa bu singari mahorat egalari koʻplab topiladi. Ulardan biri - viloyat markazining Boburshox mahallasida yashovchi Feruza Tursunova festivalda ayollar uchun tikkan kelinlar koʻylagi, talaba qizlar liboslari, mavsumiy kiyimlari bilan koʻpchilikni hayratga soldi. Kosonsoylik   Muslima Toshpoʻlatovaning  kelinlar uchun bezakli koʻylaklar, nimcha va bosh kiyimlaridan iborat  15 dan ziyod liboslar toʻplami ham eʼtiborni tortdi.

Festivalda “Ijtimoiy fikr” respublika jamoatchilik fikrini oʻrganish markazi tomonidan  “Yoshlar  modasi, anʼanalar va zamonaviy yoʻnalishlar” mavzusida ijtimoiy soʻrovnoma  oʻtkazildi.  Oʻzbek ayollari uchun milliy modani shakllantirish va kiyinish madaniyati  mavzuyidagi davra suhbatlari ishtirokchilar faolligi bilan oʻziga xos mazmun kasb etdi.

Ertaga festival tadbirlari davom etadi. Ishtirokchilar “Ideal tekstil-Orzu” va «Uzteks-Namangan» ishlab chiqarish korxonalari, “Istiqlol dizayn” oʻquv markaziga tashrif buyuradilar. “Ideal” brendi mutaxassislari tomonidan yosh dizaynerlar uchun mahorat darslari tashkil qilinadi.

Qudratilla NAJMIDDINOV. 

“Xalq soʻzi”.