Foto: TDAU axborot xizmati

Jizzax viloyatida Mirzachoʻl innovatsion qishloq xoʻjaligi Azamat maktabi faoliyatini boshladi. Ushbu loyiha Oʻzbekiston Respublikasi Prezidentining 2025-yil 10-dekabr kuni qishloq xoʻjaligi xodimlari kuni munosabati bilan soha vakillari bilan boʻlib oʻtgan uchrashuvda berilgan topshiriqlar ijrosini taʼminlash doirasida amalga oshirildi.

Kecha Qishloq xoʻjaligi vazirligi, Jizzax viloyati hokimligi, Fermerlar kengashi, Toshkent davlat agrar universiteti hamda Qishloq xoʻjaligida bilim va innovatsiyalar milliy markazi vakillari ishtirokida mazkur maktabning tantanali ochilish marosimi boʻlib oʻtdi.

Loyihaning birinchi bosqichida Jizzax viloyatining Mirzachoʻl, Doʻstlik va Arnasoy tumanlarining 100 nafardan ortiq fermerlari uchun maxsus 40 soatlik oʻquv kursiga start berildi. Oʻquv jarayonlari yuqori malakali professor-oʻqituvchilar hamda amaliyotchi mutaxassislar tomonidan paxtachilik va gʻallachilikda ilgʻor agrotexnologiyalar hamda innovatsiyalar asosida olib borilmoqda.

Shuningdek, Toshkent davlat agrar universiteti va Mirzachoʻl innovatsion qishloq xoʻjaligi Azamat maktabi oʻrtasida ilmiy, oʻquv, texnik va amaliy hamkorlik qilish boʻyicha kelishuv imzolandi.

Ushbu kelishuv fermer xoʻjaliklari va agroklasterlar oʻrtasida bilim va malaka almashinuvi, zamonaviy agrotexnologiyalarni joriy etish hamda ilmiy-amaliy hamkorlikni mustahkamlashga xizmat qiladi.