Bosh prokuratura huzuridagi Departament Beshariq tumanida 3 ming quti aksiz markasiz tamaki mahsulotlarini sotayotgan shaxsni qoʻlga oldi. Bu haqda Departamentning matbuot xizmati xabar berdi.

Qayd etilishicha, Bosh prokuratura huzuridagi Departamentning Beshariq tumani boʻlimi va IIB xodimlari hamkorligida oʻtkazilgan tezkor tadbirda ushbu holat fosh qilingan.

Maʼlum boʻlishicha, tamaki mahsulotlari savdosi bilan shugʻullanib kelgan F.R. fuqaro M.X.ga xorijda ishlab chiqarilgan Oʻzbekiston Respublikasi aksiz markasi bilan markalanmagan “Milano”, “Esse change” va “Oris change” nomli jami 3 ming quti tamaki mahsulotini 1 600 AQSH dollariga sotgan vaqtida ashyoviy dalillar bilan ushlangan.

“Mazkur holat yuzasidan Jinoyat kodeksining 25, 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qoʻzgʻatilib, tergov harakatlari oʻtkazilmoqda”, deyiladi xabarda.