Kibersport boʻyicha bakalavriat taʼlim yoʻnalishi ochiladi

10:36 17 Noyabr 2022 Jamiyat
229 0

Foto: Illustrativ surat

“Kibersport turlarini yanada rivojlantirish va keng ommalashtirishga oid qoʻshimcha chora-tadbirlar toʻgʻrisida”gi Prezident qarori (PQ–423-son, 16.11.2022-y.) qabul qilindi

Qarorga koʻra, kibersport turlari boʻyicha respublika va xalqaro chempionatlar va turnirlar tashkil etish, shuningdek, nufuzli xalqaro va mintaqaviy musobaqalarda munosib ishtirok etish kibersport turlarini rivojlantirishning asosiy yoʻnalishlaridan biri etib belgilandi.

2023-yildan anʼanaviy tarzda kibersport turlari boʻyicha:

har yili aprel oyida “Uzbekistan Esports Championship” respublika chempionati;

har yili dekabr oyida “Oʻzbekiston Respublikasi Vazirlar Mahkamasi kubogi” turniri;

har yili iyun oyida “Yoshlar kubogi” turniri oʻtkaziladi.

Qaror bilan Kibersport turlarini yanada rivojlantirish va keng ommalashtirish boʻyicha idoralararo kengash tashkil qilindi.

Shuningdek, kibersportda “ping” muammosini bosqichma-bosqich bartaraf qilishni nazarda tutuvchi Kibersport turlarini yanada rivojlantirish va keng ommalashtirish chora-tadbirlari dasturi tasdiqlandi.

Oʻzbekiston davlat jismoniy tarbiya va sport universitetida 2023/2024 oʻquv yilidan “Sport faoliyati: kibersport” bakalavriat taʼlim yoʻnalishi ochiladi hamda ushbu yoʻnalish boʻyicha oʻqish muddati 3 yil etib belgilanadi.

“Uzbekistan Esports Championship” respublika chempionatida oxirgi bir yilda gʻolib (1-oʻrin) boʻlgan kibersportchilar 2023/2024 oʻquv yilidan mazkur bakalavriat taʼlim yoʻnalishiga kasbiy (ijodiy) imtihonlarni topshirishdan ozod qilinib, ularga maksimal ball beriladi.

Tavsiya etamiz

Izohlar

Hozircha hech kim fikr bildirmagan. Balki Siz birinchilardan bo'larsiz?