Foto: Reuters

Amerikalik milliarder Ilon Mask prezident Donald Trampning muvaqqat maslahatchisi sifatidagi 130 kunlik vakolat muddati tugagach, AQSH hukumatidagi lavozimini tark etishi mumkin. Bu haqda “Bloomberg” agentligi oʻz manbalarga tayanib yozmoqda.

“Ilon Mask prezident Donald Trampning muvaqqat maslahatchisi sifatidagi 130 kunlik muddati tugaganidan soʻng Hukumat samaradorligi boshqarmasi rahbari lavozimini tark etishi kutilmoqda... Agar bu kunlar Tramp inauguratsiyasidan boshlab ketma-ket hisoblansa, uning vakolati 30-mayda tugaydi”, — deyiladi nashrda.

Aniqlik kiritilishicha, hozircha rasmiy sana belgilanmagan va Oq uy Maskning 130 kuni qachon yakunlanishini aniqlashi kerak.

Nashr, shuningdek, tadbirkor AQSH byudjeti xarajatlarini qisqartirishga hali ham jiddiy taʼsir koʻrsatishi va rasmiy ketganidan keyin ham “Trampning ishonchli vakili” boʻlib qolishi haqida yozmoqda.

Bungacha AQSHning vitse-prezidenti Jey Di Vens Mask AQSH hukumatidagi lavozimini saqlab qolishini aytgandi. Uning taʼkidlashicha, nazoratsiz AQSH byurokratiyasiga qarshi kurashda tadbirkorning roli hali tugamagan.