Hindiston “COVID-19” ikkinchi halokatli toʻlqinidan keyin Jammu va Kashmir ittifoqining sayyohlik sanoatini tiklash boʻyicha harakatlar doirasida ushbu sohada xizmat qiluvchilar hamda Srinagardagi Dal koʻli atrofida yashovchilarni infeksiyaga qarshi emlashni boshladi.

Soʻnggi bir necha hafta davomida mamlakat boʻylab koronavirus holatlari koʻpaygani bois sayyohlar uchun mashhur boʻlgan koʻlga tashriflar kamayib ketdi. Shu bois odamlarni virusdan himoya qilish uchun emlash jarayoni tezlashtirilmoqda.

Turizm boʻlimi ushbu sohaga bevosita yoki bilvosita aloqador boʻlganlarni tezkor ravishda emlashni boshlagan. Bundan koʻzlangan maqsad vodiyga koʻproq odamlar tashrif buyurishni boshlaganda, ularni xavf ostida qolmasligi taʼminlashdir.

Emlash tadbirlari sayyohlar orasida mashhur boʻlgan Paxalgam, Gulmarg kabi shaharlari Nigin va Dal koʻllari atrofida amalga oshiriladi.

Soʻnggi bir hafta ichida Dal koʻli atrofida ochilgan vaksinatsiya markazlarida ushbu sohada ishtirok etayotgan qayiqlar egalari, doʻkon sotuvchilari va taksi haydovchilarini koʻrish mumkin.