Illyustrativ foto

Germaniya kansleri va Fransiya prezidenti Suriyaning yangi hukumati bilan hamkorlik qilishga tayyor ekanliklarini maʼlum qildi. Bu haqda Germaniya hukumati matbuot kotibi Shteffen Xebeshtrayt maʼlum qildi.

“Germaniya kansleri Olaf Shols Fransiya prezidenti Emmanuel Makron bilan telefon orqali muloqot qildi. Ular birinchi navbatda Suriyadagi vaziyat haqida gaplashdilar... Har ikkisi ham fundamental inson huquqlarini hurmat qilish va etnik va diniy ozchiliklarni himoya qilish asosida yangi hukumat bilan hamkorlik qilishga tayyor ekanliklarini maʼqullashdi”, — deydi Xebeshtrayt.

“Ikkisi ham Yevropa Ittifoqining Suriyadagi ishtirokini kuchaytirish, jumladan, Suriyada inklyuziv siyosiy jarayonni qoʻllab-quvvatlash uchun birgalikda ishlashga kelishib oldi”, deya qoʻshimcha qildi Germaniya hukumati vakili. Shu oʻrinda uning qayd etishicha, keyingi harakatlar Yaqin Sharqdagi hamkorlar bilan muvofiqlashtirilgan holda muhokama qilinadi.

Shu yilning 8-dekabr kuni Suriyadagi qurolli muxolifat vakillari Damashqda davlat televideniyesini qoʻlga kiritib, mamlakat ustidan nazorat oʻrnatganliklarini efirda eʼlon qilishdi. Suriya bosh vaziri Muhammad Gʻozi al-Jaloliyning aytishicha, u va bir qancha vazirlar mamlakatda qolib, qurolli muxolifat rahbariyati bilan aloqa oʻrnatgan.

Rossiya Tashqi ishlar vazirligi Suriya prezidenti Bashar al-Asad mojaroning bir qator ishtirokchilari bilan muzokaralardan soʻng oʻz lavozimini tark etishga qaror qilgani va hokimiyatni tinch yoʻl bilan topshirish boʻyicha koʻrsatmalar berib, mamlakatni tark etgani, Rossiya esa muzokaralarda ishtirok etmagani haqida xabar berdi.

Oʻz navbatida, Kremldagi manbaning “RIA Novosti” agentligiga aytishicha, Asad va uning oilasi Moskvaga kelgan — Rossiya Federatsiyasi ularga boshpana bergan.

Agentlik suhbatdoshi, shuningdek, Rossiya rasmiylari rahbarlari Rossiya Federatsiyasi harbiy bazalari va diplomatik muassasalari xavfsizligini kafolatlagan Suriya qurolli muxolifati vakillari bilan aloqada ekanligini taʼkidladi.