Illyustrativ foto

Fargʻona viloyatida fuqaroga yolgʻon SMS yuborib, uni chuv tushirmoqchi boʻlgan suv taʼminoti korxonasi xodimi qoʻlga olindi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Departamentning Fargʻona viloyati boshqarmasi tomonidan oʻtkazilgan tezkor tadbirda “Fargʻona suv taʼminoti” AJ Margʻilon shahar filiali abonentlar boʻlimi operatori A.O. fuqaro Yo.M.ning xonadonida ichimlik suvi taʼminotidan qarzdorligi boʻlmasa-da, aholiga qarzdorliklar haqida xabar berishda foydalaniladigan telefon raqamidan Yo.M.ning telefon raqamiga goʻyoki 9,6 million soʻm qarzdorligi borligi haqida yolgʻon SMS xabarnoma yuborgan.

Shundan soʻng, xodim ushbu qarzdorlikni yopib berishi evaziga fuqarodan 9 mln soʻmni olgan vaqtida ashyoviy dalillar bilan qoʻlga tushdi.

Mazkur holat yuzasidan Jinoyat kodeksining 25, 168-moddasi (firibgarlik) va 28, 211-moddasi (pora berish) bilan jinoyat ishi qoʻzgʻatilib, tergov harakatlari oʻtkazilmoqda.

Avvalroq koʻp miqdordagi firibgarlik uchun qidiruvga berilgan Oʻzbekiston fuqarosi Amerika Qoʻshma Shtatlarida qoʻlga olinib, ekstraditsiya qilingani haqida xabar qilgandik.