FIFA jahon futbolidagi terma jamoalarning yangilangan reytingini eʼlon qildi. Yangi reytingda yetakchi oʻzgarmadi. Shu tariqa amaldagi jahon chempioni Argentina milliy terma jamoasi 1-oʻrinda qoldi.

Reytingning yuqori qismida jahon chempionatining vitse-chempioni Fransiya ikkinchi oʻrinni egallab turgan boʻlsa, “Yevro-2024” gʻolibi Ispaniya 5 pogʻona koʻtarilib, kuchli uchlikni yakunlab berdi.

Shuningdek, Angliya toʻrtinchi, Braziliya beshinchi, Belgiya oltinchi, Niderlandiya yettinchi, Portugaliya sakkizinchi, “Copa America” vitse-chempioni Kolumbiya toʻqqizinchi, shonli Italiya esa kuchli oʻninchi terma jamoa sifatida qayd etilgan.

Osiyo terma jamoalari orasida Oʻzbekiston 8-oʻrinni egalladi. Umumiy reytingda esa bir pogʻona yuqoriladi.

Kunchiqar yurt, Yaponiya, Osiyoning eng nufuzli jamoasi sifatida qayd etilgan boʻlib, xalqaro reytingda 18-oʻrinni egalladi. Eron yigirmanchi, Janubiy Koreya yigirma uchinchi, Avstraliya yigirma toʻrtinchi, Qatar oʻttiz toʻrtinchi, Iroq ellik beshinchi, Saudiya Arabistoni ellik oltinchi, Oʻzbekiston oltmish birinchi oʻrinni egallagan.

Qayd etish kerakki, Venesuela eng katta oʻsishga erishgan terma jamoa boʻldi. Lotin Amerikasi davlati 54-oʻrindan 37-oʻringacha oʻsa oldi. Bundan tashqari Turkiya ham yaxshi oʻsish qayd etib, 42-oʻrindan 26-oʻringacha koʻtarila oldi. Eng katta pasayish esa Chexiya Respublikasida qayd etildi. Yevropaning shonli termalaridan biri 34 oʻrindan 47-oʻringacha tushib ketdi.

Avvalroq Argentinaliklar “Copa America” chempioni boʻlgach fransuzlarni haqorat qilib qoʻshiq kuylashgani va buning ortidan FIFA oʻrganish boshlagani haqida xabar berilgandi.