ФИФА жаҳон футболидаги терма жамоаларнинг янгиланган рейтингини эълон қилди. Янги рейтингда етакчи ўзгармади. Шу тариқа амалдаги жаҳон чемпиони Аргентина миллий терма жамоаси 1-ўринда қолди.

Рейтингнинг юқори қисмида жаҳон чемпионатининг вице-чемпиони Франция иккинчи ўринни эгаллаб турган бўлса, «Евро-2024» ғолиби Испания 5 поғона кўтарилиб, кучли учликни якунлаб берди.

Шунингдек, Англия тўртинчи, Бразилия бешинчи, Бельгия олтинчи, Нидерландия еттинчи, Португалия саккизинчи, «Copa America» вице-чемпиони Колумбия тўққизинчи, шонли Италия эса кучли ўнинчи терма жамоа сифатида қайд этилган.

Осиё терма жамоалари орасида Ўзбекистон 8-ўринни эгаллади. Умумий рейтингда эса бир поғона юқорилади.

Кунчиқар юрт, Япония, Осиёнинг энг нуфузли жамоаси сифатида қайд этилган бўлиб, халқаро рейтингда 18-ўринни эгаллади. Эрон йигирманчи, Жанубий Корея йигирма учинчи, Австралия йигирма тўртинчи, Қатар ўттиз тўртинчи, Ироқ эллик бешинчи, Саудия Арабистони эллик олтинчи, Ўзбекистон олтмиш биринчи ўринни эгаллаган.

Қайд этиш керакки, Венесуэла энг катта ўсишга эришган терма жамоа бўлди. Лотин Америкаси давлати 54-ўриндан 37-ўрингача ўса олди. Бундан ташқари Туркия ҳам яхши ўсиш қайд этиб, 42-ўриндан 26-ўрингача кўтарила олди. Энг катта пасайиш эса Чехия Республикасида қайд этилди. Европанинг шонли термаларидан бири 34 ўриндан 47-ўрингача тушиб кетди.

Аввалроқ Аргентиналиклар «Copa America» чемпиони бўлгач французларни ҳақорат қилиб қўшиқ куйлашгани ва бунинг ортидан ФИФА ўрганиш бошлагани ҳақида хабар берилганди.