Фото: Goal.com

Аргентина «Copa America» чемпиони бўлгач, терма жамоа футболчилари автобусда Франциянинг қора танли футболчиларига нисбатан ирқчилик кайфиятидаги қўшиқ куйлашди. Унда шундай дейилади: «Улар Францияда ўйнашади. Лекин Анголадан келишган. Оналари нигериялик. Оталари камерунлик. Паспортидагина франциялик».

Франция футбол федерацияси Аргентина терма жамоаси устидан ФИФАга шикоят жўнатди. Федерация президенти Филипп Диалло ушбу ҳолатни кескин қоралаб, жаҳон футболи мутасаддиларини чора кўришга чақирди.

Ушбу қўшиқ акс этган видео аргентиналик ярим ҳимоячи Энцо Фернандеснинг «Инстаграм»идаги жонли эфир пайтида куйланган. Бироздан кейин футболчи эфирни узиб қўйди, лекин видео тарқалиб кетди.

Кейинчалик Фернандес узр сўради.

«Қўшиқ жуда ҳақоратли эди ва ўзимни оқлаш учун бирор важ келтира олмайман. Мен ҳар қандай кўринишдаги камситишларга қаршиман ва «Copa America» ғалабасини нишонлаш эйфориясига тушиб қолганим учун узр сўрайман», дейди футболчи. Унинг қўшимча қилишича, видео унинг эътиқоди ёки характерини акс эттирмайди.

ФИФА ушбу ҳолатни ўрганиб чиқмоқда. Ҳозирча ташкилотнинг қандайдир чора кўриши номаълум. Аммо Энцо Фернандеснинг клуби — «Челси» бу масалани жиддий кўриб чиқяпти. Жамоа раҳбарияти ҳаттоки Энцони жамоадан четлатиши ҳам мумкин.

Фернандеснинг «Челси»даги жамоадоши, Франциялик ҳимоячи Уэсли Фофана ижтимоий тармоқларда воқеани танқид қилди. У шу ўринда «2024 йилда футбол: чекланмаган ирқчилик», деган қўшиқни эслатиб ўтди. Ирқчиликка қарши кураш ассоциацияси аргентиналикларни қўшиғини «ўта ўнг идеологиянинг ифодаси», деб атади ва ФИФАни чора кўришга чақирди.

«Фақатгина ҳайрон қолиш мумкин, нега Америка кубогидаги ғолибликдан сўнг Аргентина Францияни эслаб, ҳақоратлаб мазза қиляпти», деб ёзди ўзбекистонлик спорт журналисти Даврон Файзиев.

Аввалроқ, «Copa America»да Аргентина чемпион бўлгани ҳақида хабар бергандик.