Foto: Халқ сўзи

Respublika shoshilinch tibbiy yordam ilmiy markazi Fargʻona filialida ilk bor buyrak transplantatsiyaci amaliyoti oʻtkazildi.

Respublika shoshilinch tibbiy yordam ilmiy markazining xirurgiya boʻlimi rahbari, tibbiyot fanlari doktori, professor Farhod Xadjibayev rahbarligidagi 12 kishilik guruh hamda markazning Fargʻona filiali shifokorlari ishtirokida buyrak koʻchirib oʻtkazish amaliyoti muvaffaqiyatli bajarildi. Murakkab jarrohlik amaliyoti 6 soatdan ortiq davom etdi. Shifokorlarning maʼlum qilishicha, hozirda bemorlarning ahvoli yaxshi.

Shunday qilib, Uchkoʻprik tumanida yashovchi 31 yoshli Gulasal Sobirovada surunkali buyrak yetishmovchiligining beshinchi bosqichi boshlangan boʻlib, turmush oʻrtogʻi Dilshod Sobirov donorlik qilishga rozilik bildirgach, zaruriy tibbiy tekshiruvlar amalga oshirildi va buyrak koʻchirish boʻyicha dastlabki murakkab jarrohlik amaliyoti boʻlib oʻtdi.

Taʼkidlash oʻrinliki, bugungi kunda Fargʻona viloyatida surunkali buyrak yetishmovchiligi bilan ogʻrigan bemorlarning 260 nafari doimiy ravishda gemodializator apparati orqali muolaja oladi. Ayni paytda viloyatda oltmish nafarga yaqin bemorlar buyrak koʻchirish amaliyotini oʻtkazishga muhtoj.

Botir Madiyorov, “Xalq soʻzi”.