Arxiv foto

Yevropa davlatlari mudofaa xarajatlari uchun 200 milliard yevro sarmoya jalb qilishi kerak, bu byudjetning 3-3,5 foizini tashkil qilishi kerak. Bu fikrlarni Fransiya prezidenti Emmanuel Makron Italiyaning “Foglio” gazetasiga bergan intervyusida aytib oʻtdi.

Yevrokomissiya prezidenti Ursula fon der Lyayen payshanba kuni boʻlib oʻtadigan Ukraina sammitida Yevropa Ittifoqining mudofaa salohiyatini mustahkamlash strategiyasini taqdim etishini ilgari surgan edi. “Bloomberg”ning xabar berishicha, Yevropa Ittifoqi mudofaa uchun qoʻshimcha mablagʻ ajratish uchun yuzlab milliard yevro ajratish niyatida. Bu byudjet qoidalarini oʻzgartirish, mumkin boʻlgan birgalikda moliyalashtirish va mavjud mablagʻlarni qayta taqsimlashni oʻz ichiga oladi.

“Boshida sarmoya kiritish uchun bizga 200 milliard yevro kerak, lekin shu bilan birga, men uchun payshanba kungi muhokamadan maqsad — biz oʻz vakolatlarimizni oshirish va Yevropaning keng avtonomiyasiga erishmoqchi boʻlgan umumiy imkoniyatlarni aniqlash”, — deydi Makron.

Prezident Rossiyaning mudofaa xarajatlarini ham misol qilib keltirdi.

“Amerikaliklar nima qilishmasin, bizni nima kutayotganiga tayyorgarlik koʻrishimiz kerak”, — deydi Fransiya yetakchisi.

“Foglio” nashrining taʼkidlashicha, u Yevropa uchun mudofaa xarajatlarini “yalpi ichki mahsulotning 3-3,5 foizi atrofida” belgilab qoʻygan.

Avvalroq, AQSH prezidenti Donald Tramp Yevropani NATOning mudofaa salohiyatiga qoʻshgan hissasi pastligi uchun bir necha bor tanqid qilgan va barcha aʼzo davlatlardan mudofaa xarajatlarini yalpi ichki mahsulotning 5 foizigacha oshirishni talab qilgan boʻlsa, Pentagon kotibi Pit Xegset AQSH Yevropadagi harbiy ishtirokini hozircha qisqartirishni rejalashtirmayotganiga ishontirdi.

61-Myunxen xavfsizlik konferensiyasida AQSH vitse-prezidenti Jeyms Devid Vens NATO Bosh kotibi Mark Ryutte bilan uchrashuvda Yevropa Ittifoqi davlatlarining mudofaa xarajatlarini oshirish va ittifoq doirasidagi yukni adolatliroq taqsimlash zarurligi haqida gapirdi.