Elektr energiyasidan nooqilona foydalanib kelgan korxona jarimaga tortildi. Bu haqda Elektr energiyasi, neft mahsulotlari va gazdan foydalanishni nazorat qilish inspeksiyasi xabar qildi.

“Oʻzenergoinspeksiya” Qoraqalpogʻiston Respublikasi hududiy boshqarmasi tomonidan oʻtkazilgan nazorat tadbirida Toʻrtkoʻl tumanida joylashgan “T.” AJ tomonidan reaktiv quvvatni kompensatsiya qilmasdan, elektr energiyasidan samarasiz va nooqilona foydalanib kelayotganligi aniqlandi.

Ushbu qoidabuzarlik natijasida Oʻzbekiston Respublikasining 940-sonli Qonunining 45-moddasi boʻyicha hisob-kitob qilinib, 108,5 million soʻm miqdorida moliyaviy sanksiya qoʻllanildi.

Taʼkidlash joiz, reaktiv quvvat kompensatsiyasi boʻyicha ishlarni tashkil etish tartibini buzish yoki unga rioya etmaslik – asbob-uskunalar yoki normativ usullar bilan aniqlangan isrof boʻlgan elektr energiyasi miqdori qiymatining 50 foizi miqdorida jarima solishga sabab boʻladi.

Avvalroq maishiy gaz ballonlari texnika va yongʻin xavfsizligi talablariga mutlaqo zid ravishda saqlanayotganligi toʻgʻrisida ham xabar qilingandi.

Maʼlum boʻlishicha, Qashqadaryo viloyati Kasbi “Denov” MFYda faoliyati toʻxtatilgan servis markazida maishiy gaz ballonlari noqonuniy tarzda, texnika va yongʻin xavfsizligi talablariga mutlaqo zid ravishda saqlanayotgan boʻlgan.

Xususan, ushbu faoliyati toʻxtatilgan servis markazida jami 206 dona gaz ballon (jami 4120 kg suyultirilgan uglevodorod gazi toʻldirilgan gaz ballonlari) noqonuniy saqlanayotganligi aniqlandi. Hozirda huquqni muhofaza qilish organlari tomonidan tergovga qadar tekshiruv ishlari olib borilmoqda.