Foto: Hasan Paydoyev/«Xalq so‘zi»

Toshkent shahri mezbonlik qilgan dzyudo boʻyicha “Katta Dubulgʻa” turniri yakunlandi. Uch kun davom etgan bellashuvlarda dunyoning 68 mamlakatidan kelgan jami 495 nafar sportchi medallar hamda jahon va “Parij-2024” Olimpiadasi uchun muhim boʻlgan reyting ochkolari uchun kurash olib borishdi.

Nufuzli musobaqada 2 ta oltin, 1 ta kumush va 3 ta bronza medalini qoʻlga kiritgan Oʻzbekiston terma jamoasi turnirni umumjamoa hisobidan uchinchi oʻrinda yakunladi. Bellashuvlarda hamyurtlarimizdan Doston Roʻziyev (-60 kg) va Muzaffarbek Toʻraboyev (-100 kg) oltin, Gulhayo Joʻrayeva (-52 kg) kumush, Shahram Ahadov (-73 kg), Obidxon Noʻmonov (-73 kg), Davlat Bobonov (-90 kg) bronza medalini qoʻlga kiritdi.

“Katta Dubulgʻa” turnirida gʻoliblik boʻlgan sportchilar jahon va “Parij-2024” Olimpiadasi uchun reyting 1000, kumush medallar sohiblari 700, kuchli uchlikdan joy olganlar esa 500 ochkoga ega boʻlishdi.

Toshkent “Katta Dubulgʻa” turnirida 3 ta oltin, 2 ta kumush va 1 ta bronza medallariga ega chiqqan Fransiya terma jamoasi umumjamoa hisobida birinchi, 2 ta oltin, 3 ta kumush va 6 ta bronza medalini jamgʻargan yaponiyalik dzyudochilar ikkinchi oʻrinni band etdi.