Фото: Ҳасан Пайдоев/«Халқ сўзи»

Тошкент шаҳри мезбонлик қилган дзюдо бўйича “Катта Дубулға” турнири якунланди. Уч кун давом этган беллашувларда дунёнинг 68 мамлакатидан келган жами 495 нафар спортчи медаллар ҳамда жаҳон ва “Париж-2024” Олимпиадаси учун муҳим бўлган рейтинг очколари учун кураш олиб боришди.

Нуфузли мусобақада 2 та олтин, 1 та кумуш ва 3 та бронза медалини қўлга киритган Ўзбекистон терма жамоаси турнирни умумжамоа ҳисобидан учинчи ўринда якунлади. Беллашувларда ҳамюртларимиздан Достон Рўзиев (-60 кг) ва Музаффарбек Тўрабоев (-100 кг) олтин, Гулҳаё Жўраева (-52 кг) кумуш, Шаҳрам Аҳадов (-73 кг), Обидхон Нўмонов (-73 кг), Давлат Бобонов (-90 кг) бронза медалини қўлга киритди.

“Катта Дубулға” турнирида ғолиблик бўлган спортчилар жаҳон ва “Париж-2024” Олимпиадаси учун рейтинг 1000, кумуш медаллар соҳиблари 700, кучли учликдан жой олганлар эса 500 очкога эга бўлишди.

Тошкент “Катта Дубулға” турнирида 3 та олтин, 2 та кумуш ва 1 та бронза медалларига эга чиққан Франция терма жамоаси умумжамоа ҳисобида биринчи, 2 та олтин, 3 та кумуш ва 6 та бронза медалини жамғарган япониялик дзюдочилар иккинчи ўринни банд этди.