Foto: EPA

Yakov Milatovich Chernogoriyaning yangi prezidenti etib saylandi. U saylovda qariyb 59 foiz ovoz olgan.

Chernogoriyaning sobiq iqtisodiyot vaziri Yakov Milatovich prezidentlik saylovlarining ikkinchi bosqichida gʻalaba qozonganini eʼlon qildi. Mamlakatning yangi rahbarining saylanishi Milo Jukanovichning 30 yildan ortiq davom etgan boshqaruviga nuqta qoʻyadi.

37 yoshli Milatovich “Yevropa hozir” harakati rahbari oʻrinbosari. Saylov kampaniyasi doirasida u korrupsiyaga qarshi kurashish, turmush darajasini yaxshilash va Yevropa Ittifoqi va Serbiya bilan aloqalarni mustahkamlashga vaʼda berdi. Shuningdek, u besh yil ichida mamlakatning Yevropa Ittifoqiga qoʻshilishiga erishishga vaʼda berdi.

61 yoshli Jukanovich, sobiq kommunist, Yugoslaviya parchalanganidan keyin Chernogoriyani 33 yil davomida prezident yoki bosh vazir lavozimida boshqargan. U magʻlubiyatini tan oldi va Milatovichni gʻalabasi bilan tabrikladi. Saylangan prezident deyarli 59 foiz ovoz olgan, Jukanovich esa 40 foiz ovoz olgan.

Saylovlar 2-aprel, yakshanba kuni boʻlib oʻtdi.