Tuman va viloyat bosh shifokorlari respublika markazlari bilan toʻgʻridan-toʻgʻri ishlaydigan, integratsiyalashgan tizim joriy qilinishi belgilandi.

“Shunda xalq bilan muloqot paydo boʻladi, odamlarimiz bundan rozi boʻladi, tibbiyot tizimiga xolis bahoni oʻzi beradi”, – dedi Prezident.

Endilikda 26 ta markaz direktorlari, viloyat, tuman sogʻliqni saqlash rahbarlari, oilaviy poliklinika mudirlari bir oylik aniq reja asosida ishlashga oʻtadi.

“Barcha markaz rahbarlari eshitib olsin: markazlar shaxsiy mulk emas, ularning barchasi davlatniki, xalqniki” — dedi Prezident.

Qarshi shahri, Angor va Boʻston tumanlarida yurak-qon tomir kasalliklari yuqori boʻlishiga qaramasdan, Kardiologiya markazi bu borada aniq chora-tadbir belgilamagani aytildi.

Davlat rahbari bu ishlarning ahvolini aniq misollar asosida tahlil qildi.

Prezident Shavkat Mirziyoyev ushbu yigʻilish xalqimiz uchun ham, tibbiyot sohasi va uning vakillari uchun ham foydali boʻlishi kerakligini koʻrsatib oʻtdi. Shu bois, yechimini kutayotgan masalalarni ochiq-oydin gaplashib olishni taklif etdi.

Davlat rahbari aholi salomatligini saqlashda yaqindan koʻmak berayotgan xorijiy hamkorlarga alohida hurmat va ehtiromini izhor etdi.

“Birinchi marta 45 ta tumanda buyrak koʻchirib oʻtkazish amaliyoti yoʻlga qoʻyilgani inson salomatligi borasidagi ishlarimizning yaqqol amaliy tasdigʻidir”, – dedi Prezident.

Davlatimiz rahbari yigʻilganlarni Sogʻliqni saqlash sohasi xodimlari kuni bilan samimiy tabrikladi, el-yurtimiz salomatligi posbonlari boʻlgan barcha shifokor va hamshiralar, soha mutaxassislariga oʻzining chuqur hurmati va ezgu tilaklarini bildirdi.