Foto: Videodan kadr

Buxoro viloyati Kogon shahridagi “Oʻzbekiston temiryoʻllari” AJga qarashli idora oldida ikki kishi pichoqlandi. Bosh prokuratura matbuot kotibi Hayot Shamsutdinov “Xalq soʻzi”ga mazkur holat yuzasidan maʼlumot berdi.

Bildirilishicha, voqea kecha, 13-oktyabr kuni taxminan soat 13:10 da Kogon shahrida sodir boʻlgan. 1971-yilda tugʻilgan A. G. (erkak) oldindan mavjud boʻlgan kelishmovchilik tufayli tanishlari 1963-yilda tugʻilgan N.A. (ayol) hamda 1995-yilda tugʻilgan U. D. (erkak)ni qasddan oʻldirish maqsadida tanalarining turli sohalariga oshxona pichogʻi bilan urgan. Oqibatida U. D. shahar tibbiyot birlashmasida olgan tan jarohatlari bilan vafot etgan. Ayolga shifoxonada zarur tibbiy yordam koʻrsatilmoqda.

Mazkur holat yuzasidan Kogon shahar prokuraturasi tomonidan fuqaro A.G.ga nisbatan Jinoyat kodeksining 25- (Jinoyatga tayyorgarlik koʻrish va jinoyat sodir etishga suiqasd qilish), 97-moddasi (Qasddan odam oʻldirish) 2-qismi “a” bandi bilan jinoyat ishi qoʻzgʻatilib, protsessual tartibda ushlangan.