Elektron sigaretalar texnik standartlarga mos kelmasligi yoki chekuvchining oʻzi uning konstruksiyasini oʻzgartirishi tufayli chekuvchilarda jismoniy jarohat, shu jumladan, qurilmalarning portlashi yoki nosozligi tufayli kuyishlar kuzatilishi mumkin.

— Tarkibida zaharli moddalar – qoʻrgʻoshin, kadmiy, simob, nikel, ruh va boshqa moddalar borligi sababli foydalanilgan elektron sigaretalarni umumiy chiqindilarga qoʻshib boʻlmaydi — deydi Sogʻliqni saqlash vazirligining tamakiga qarshi kurashish boʻyicha bosh konsultanti Shuhrat Shukurov. — Ularning tarkibiy qismida litiy-ionli batareyka (akkumulyator) boʻlib, qurilma bir marta ishlatilgandan soʻng batareyka bilan birga tashlab yuboriladi.

Plastmassadan tayyorlangan korpus va batareyka utilizatsiya qilinishi va qayta ishlanishi zarur.

Ular boshqa maishiy chiqindilarga aralashib ketsa, asta-sekin qoplamasi yemirila boshlaydi, xavfli elementlar tuproqqa, keyin yer usti va yer osti suvlariga tushadi.

Batareykalar chiqindi yoqiladigan zavodga borib qolsa, zaharli birikmalar atmosfera havosini ifloslaydi.

Bundan tashqari, atmosfera havosiga chiqariladigan aerozolda nafaqat nikotin va aromatizatorlar, balki hali yaxshi oʻrganilmagan boshqa zaharli moddalar ham bor.

Tabiatga katta xavf tugʻdirishi munosabati bilan Fransiya, Belgiya, Buyuk Britaniya, Irlandiya, Germaniya kabi Yevropa mamlakatlari elektron sigaretalarni taqiqlash masalasini koʻrib chiqmoqdalar. Germaniya jamoatchiligi hukumatni elektron sigaretalarni butun Yevropa Ittifoqi boʻylab taqiqlashga undamoqda.