Bagama orollarini tadqiq qilish davomida suv ostidan katta miqdordagi harbiy qurollar topildi. “Allen Exploration” tadqiqotchilarining maʼlum qilishicha, ushbu harbiy toʻplar 1853—1855-yillardagi Qrim urushidan nodir namunalar boʻlib, jami 24 ta temir toʻp hujjatlashtirib olindi.

Ushbu toʻplar dastlab Rossiya imperiyasi tomonidan Usmonli imperiyasi, Fransiya, Buyuk Britaniya va Sardiniya kabi ittifoqchi davlatlarga qarshi ishlatilgan. Ularning Karib dengiziga qanday tushib qolgani haqidagi savolga esa aniq javob yoʻq.

Toʻplar 1656-yilda yoʻqolgan ispan galleoni (harbiy va tijorat kemasi) “Nuestra Señora de la Maravillas” qoldiqlarini oʻrganish paytida topilgan. Topilma joyi Bagama qirgʻogʻidagi “Xotira” qoyasidan 6,5 kilometr shimoli-gʻarbda boʻlgan.

Gap shundaki, ushbu toʻplarda rus podshohlarining gerbi boʻlgan ikki boshli burgut tasvirlangan. “AllenX” jamoasining fikricha, toʻplar Ikkinchi jahon urushi paytida boshqa zamonaviy qurollar yaratish uchun yuborilgan, ammo oʻz manziliga etib bormagan. Toʻplarni olib ketayotgan kema choʻkib ketgan.

Hozirda ushbu topilmalarning taqdiri maʼlum emas. “Allen Exploration” ushbu qurollarni muzeyga topshirishi kutilmoqda. Topilmalar boʻyicha qoʻshimcha izlanishlar olib boriladi.