Qudratilla Najmiddinov/“Xalq soʻzi”. Namangan shahridagi “Afsonalar vodiysi” tematik parkida “Yangi Oʻzbekiston armiyasi – mamlakat tayanchi, xalqimiz faxri“ shiori ostida vatanparvarlik festivali oʻtkazildi. Yurtimizda davom etayotgan “Vatanparvarlik oyligi” doirasida tashkil etilgan tadbirda harbiy xizmatchilar tomonidan yoshlar oʻrtasida yurtga muhabbat gʻoyalarini targʻib etishga yoʻnaltirilgan musiqiy va koʻrgazmali chiqishlar namoyish etildi. Harbiy texnika va qurol-yarogʻ koʻrgazmalari ayniqsa, koʻpchilik eʼtiborini tortdi. Tadbirning yorqin lahzalaridan biri gulxan atrofidagi musiqa kechasi boʻldi. Bunda milliy kuy va harbiy mavzudagi qoʻshiq va raqslar ishtirokchilar qalbiga chinakam bayramona kayfiyat olib kirdi.

— Anjumanga yigʻilgan uch yuzdan ortiq yigit-qizlar festivaldagi koʻrgazma va tomoshalardan zavqlandi, — deydi Yoshlar ishlari Namangan viloyat boshqarmasi boshligʻi Baxtiyor Mirzatov. — Harbiy texnikalar namoyishi, askarlarning sport va jangovarlik yoʻnalishidagi chiqishlari ularning mamlakat mudofaa qudrati, vatan himoyachilarining salohiyati haqidagi tushunchalarini yanada boyitdi. Askarlar bilan muloqot, jangovar qurollar bilan yaqindan tanishuv harbiy xizmatni orzulab yurgan koʻplab yigitlarning yuragiga choʻgʻ tashladi.

Oylik doirasidagi uchrashuv va muloqotlar viloyatdagi harbiy qismlar va taʼlim muassasalarida ham davom etmoqda.