Foto: Xalq so‘zi

Prezidentimiz Shavkat Mirziyoyev tashabbusi bilan Qarshi tumanidagi Abul Muin Nasafiy maqbarasi obod maskanga aylantirildi, buyuk olim asarlari tarjima qilinib, xalqimizga yetkazildi. Ayni paytda Qashqadaryodagi eng chiroyli va shinam goʻshalardan biri sanalgan ushbu qadamjodan ziyoratchilarning qadami uzilmayapti.

Diqqatga sazavor tomoni shundaki, ziyoratgohda XI asrda oʻtqazilgan tut daraxti mavjud boʻlib, hali ham odamlar mevasidan bahramand boʻlishmoqda.

Oʻzbekiston Ekologik partiyasi vakillari va tarixchi olimlar Abu Muin Nasafiy ziyoratgohida boʻlib, XI asrda ekilgan qadimiy tut daraxtini koʻzdan kechirishdi.

— Necha-necha asrlarni koʻrgan bu tut daraxti yerga chuqur tomir otgan, — deydi ziyoratgoh agronomi Bahodir Joʻrayev. — Ammo biz qadimiy bu tutni tashqi taʼsirlardan, kasalliklardan asrash boʻyicha ish olib boryapmiz. Ziyoratchilar va turistlarning qadimiy daraxtga qiziqishi yuqori ekanini ham taʼkidlamoq joiz.

Tarixchilar hamda mutaxassis ekologlar ziyoratgoh xodimlariga noyob tut daraxtini muhofaza qilish, ushbu yodgorliklarni yaxshi parvarishlash hamda xavf-xatarlardan asrash haqida zarur tavsiyalarni berdi.

Faxriddin Bozorov, “Xalq soʻzi”.