Rossiya Federatsiyasining Moskva shahridagi “Emir Kons” qurilish korxonasida ishlayotgan 230 nafar fuqaroning iyun, iyul oylari uchun ish haqi toʻlanmaganligi haqida murojaat kelib tushgan.

Ushbu murojaat yuzasidan Tashqi mehnat migratsiyasi agentligining Moskva shahridagi vakolatxonasi negizidagi Mehnat migrantlarining murojaatlari bilan ishlash va ularga huquqiy koʻmaklashish markazi xodimlari ish beruvchi bilan muzokara oʻtkazish orqali fuqarolarning huquqlarini tiklash maqsadida “Emir Kons” korxonasiga yetib borib, fuqarolar bilan tushuntirish ishlari olib bordi.

Fuqarolar bilan suhbatda 210 nafar fuqaroning 17,287,510 rubl miqdorida 2 oylik maoshi toʻlanmaganligi maʼlum boʻldi.

Ish beruvchi barcha qarzdorlikni 17-avgust kuni bartaraf etishini maʼlum qildi, ammo vaʼdasini kafolat xati bilan tasdiqlashni rad etdi.

Shuningdek, fuqarolardan FMS xodimlari tekshirish uchun kelmasligi sababli har oylik maoshidan 2 ming rubldan ushlab qolinishi maʼlum boʻldi.

Mehnat migrantlarining huquqlarini himoya qilish uchun Rossiya Federatsiyasi IIVning iqtisodiy xavfsizlik va korrupsiyaga qarshi kurashish tezkor boʻlimi podpolkovnigi bilan Markaz xodimlari ishtirokida fuqarolar jabirlanuvchi sifatida suroq qilindi va ish beruvchiga nisbatan jinoyat ishi ochildi.