Foto: Prezident Matbuot xizmati

Shavkat Mirziyoyev “Imom Termiziy tavalludining 1200 yilligini keng nishonlash toʻgʻrisida”gi Qarorni imzoladi. Bu haqda “Huquqiy axborot” Telegram kanali maʼlum qildi.

Qayd etilishicha, 2024-yil oktyabr oyida Imom Termiziy tavalludining 1200 yilligi keng nishonlanadi. Tadbirni yuqori saviyada nishonlash boʻyicha quyidagilarni nazarda tutuvchi chora-tadbirlar dasturi ham ushbu qarorga koʻra tasdiqlandi.

Birinchidan, Imom Termiziyning “Ash-Shamoil al-Muhammadiyya” va “Sunani Termiziy” asarlarini moturidiylik aqidasi va hanafiylik mazhabiga tayangan koʻp jildlik akademik tarjima va sharhini tayyorlash hamda ularni nashr etish belgilandi.

Ikkinchidan, 2024-yil oktyabr oyida Toshkent shahrida “Islom – tinchlik va ezgulik dini” mavzusida xalqaro ilmiy-amaliy konferensiya hamda konferensiya doirasida Termiz shahrida “Imom Termiziy ilmiy merosining islom sivilizatsiyasida tutgan oʻrni” mavzusida xalqaro ilmiy-amaliy anjuman oʻtkazish rejasi tasdiqlandi.

Uchinchidan, 2024-yil sentyabr-oktyabr oylarida Termiz davlat universiteti va Oʻzbekiston xalqaro islom akademiyasida “Termiziy allomalarning ilmiy-maʼnaviy merosi: oʻtmish va bugun” mavzusida respublika ilmiy-amaliy konferensiyasi hamda Imom Termiziy hayoti va ilmiy faoliyatiga oid ilmiy maqolalar tanlovi oʻtkaziladi.

Bundan tashqari, ushbu qonun bilan Oʻzbekiston musulmonlari idorasiga imom-xatiblar va diniy taʼlim muassasalari talabalari oʻrtasida “Imom Termiziy asarlari boʻyicha hadislar bilimdoni” tanlovini oʻtkazish va gʻoliblarni munosib taqdirlash tavsiya etildi.

Avvalroq, qaysi sohada maxsus roʻyxatdan oʻtgan QQS toʻlovchilar soni eng koʻp ekanligi haqida xabar berilgandi.