Фото: Архив сурат

Жиззах вилоятида Россия томонидан Украинага қарши қуролли тўқнашувларда иштирок этган фуқарога суд ҳукми чиқарилди. Бу ҳақда Зафаробод туман судининг 2025 йил 30 июль санасидаги жиноят ишлари бўйича қарорида қайд этилган.

Маълумотларга кўра, 24 ёшли К.С. ўтган йилнинг октябрь ойида меҳнат қилиш мақсадида Россияга борган. У Telegram мессенжерида ойига 150 минг рубл маош ваъда қилинган ўрмон кесиш ишлари бўйича эълонни кўриб, ишлашга рози бўлган.

Келишув асосида тиббий кўрикдан ўтиб, шартнома тузган. Бироқ кейинчалик у Россия Қуролли кучларида хизмат қилиш бўйича контракт имзолаганини англаб етган.

Ўтган йилнинг ноябрь ойида у Россия ва Украина ўртасидаги тўқнашувлар давом этаётган Курск вилоятидаги Большее Солдатское қишлоғида фронт чизиғини қўриқлашда иштирок этган. Агар у хизматдан воз кечса, қамоқ жазоси билан қўрқитилган.

Суд ҳужжатларига кўра, жорий йилнинг январь–февраль ойларида у Суджа шаҳрида бўлиб, жанговар нуқталарга озиқ-овқат етказиш билан шуғулланган. Буйруқни бажариш пайтида совуқдан азият чекиб, даволаниш учун юборилган.

Соғлиги тикланганидан сўнг, уни яна фронтга жўнатиш режалаштирилганини эшитгач, Ўзбекистоннинг Россиядаги элчихонасига мурожаат қилган. У яширин тарзда ҳарбий лагерни тарк этиб, Москвага йўл олган ва элчихона орқали қайтиш гувоҳномаси расмийлаштирилгандан сўнг Тошкентга қайтган.

Суд жараёнида у қуролли тўқнашувларда иштирок этиш ноқонуний эканини билмаганини, контрактни алданиб имзолагани ва таҳдидлар туфайли хизматни давом эттирганини билдирган. Шунингдек, имконият туғилган замон Ватанга қайтиш ниятида бўлганини айтган. К.С. ўз айбини тан олган ва суддан енгилроқ жазо тайинлашни сўраган, чунки у оиладаги ягона фарзанд ҳисобланади.

Суд унга Ўзбекистон Республикаси Жиноят кодексининг 154-моддаси 1-қисми (Ёлланма жангчи сифатида қатнашиш) бўйича айблов эълон қилиб, 4 йил муддатга озодликни чеклаш жазосини тайинлади.