Фото: UzAuto Motors

Жиззах вилоятида тўртта юк машинаси иштирокида йўл-транспорт ҳодисаси содир бўлган. Бу ҳақда вилоят ИИБ ЙҲХБ ахборот хизмати хабар бермоқда.

Қайд этилишича, бугун 8 июнь куни М-39 автомобиль йўлининг Жиззах вилояти ҳудудидан ўтган довон қисмида Тошкент-Самарқанд йўналишида келаётган МАN юк автомобилида носозлик кузатилган.

Шундан сўнг мазкур автомобиль бошқарувни йўқотган ва аввалига йўл четида тўхтаб турган юк машинасини, кейин олдинда кетаётган транспорт воситаларини ташишга мўлжалланган автотрейлер ва яна бир юк машинаси билан тўқнашиб, йўл-транспорт ҳодисаси содир қилган.

Оқибатда юк машиналарининг ҳайдовчи ва йўловчиларига тан жароҳати етмаган, бироқ транспорт воситаларига жиддий шикаст етган.

«М-39 автомобиль йўлининг 1011-1013-километрида сунъий тирбандлик ҳосил бўлган, ҳозирда ЙПХ ходимлари тирбандликларни бартараф этиш чораларини кўрмоқда», дейилади ЙҲХБ хабарида.

Ижтимоий тармоқларда тарқалган видеода трейлерга ортилган «Equinox», «Tracker» ва «Cobalt» каби енгил машиналарга жиддий зарар етганини ҳам кўриш мумкин.

UzAuto Motors компаниясининг аниқлик киритишича, ЙТҲга учраган автотрейлерда Cobalt ва Equinox автомобиллари Сурхондарё вилоятидаги дилерлик марказига олиб кетилаётган бўлган.

Ҳодиса оқибатида компаниянинг 4 та «Cobalt» ва учта «Equinox» автомобили техник шикастланган.

Жиззах вилояти Йўл ҳаракати хавфсизлиги бошқармаси томонидан дастлабки тергов ҳаракатлари олиб борилмоқда.