Полшанинг Варшава шаҳрида бўлиб ўтган бокс бўйича Жаҳон кубоги мусобақаси якунига етди. Унда Ўзбекистон терма жамоаси боксчилари юқори натижалар қайд этиб, юртимиз спорти тарихига яна бир ёрқин саҳифа қўшди.

Мусобақанинг сўнгги кунида етти нафар спортчимиз финал жангларида рингга чиқиб, улардан олти нафари олтин, бири эса кумуш медални қўлга киритди. Шунингдек, икки нафар боксчимиз бронза медали билан тақдирланди.

Финал жангларида -55 кг вазн тоифасида Миразизбек Мирзаҳалилов мўғулистонлик рақиби Билгунсаихан Харкҳуни 5:0 ҳисобида енгиб, олтин медалга сазовор бўлди. -65 кг вазн тоифасида Асадхужа Мўйдинхўжаев болгариялик Викторио Илиев устидан 5:0 ҳисобида ишончли ғалабага эришди.

-80 кг тоифасида Жаҳонгир Умматалиев Италия вакили Алфред Коммейни ҳам 5:0 ҳисобида мағлуб этди. -75 кг вазн тоифасида Фазлиддин Эркинбоев болгариялик Рами Киванни йирик ҳисобда енгди. -85 кг тоифасида Акмалжон Исроилов Полша вакили Якуб Страсзевскийни 2-раунддаёқ техник нокаут билан мағлубиятга учратди.

+92 кг вазн тоифасида Жаҳонгир Зокиров норвегиялик Омар Шиҳани 5:0 ҳисобида енгиб, мусобақадаги олтинчи олтин медални Ўзбекистон ҳисобига ёзиб қўйди.

Аёллар ўртасидаги -57 кг вазн тоифасида рингга чиққан Ҳуморабону Мамажонова полшалик рақиби Жулиа Сереметага қарши жангда мағлуб бўлиб, кумуш медал билан чекланишга мажбур бўлди.

Бундан ташқари, -60 кг вазн тоифасида Самандар Олимов ва -70 кг тоифасида Ғофур Тўхиров бронза медалларини қўлга киритди. Умуман олганда, Ўзбекистон терма жамоаси мусобақани 6 та олтин, 1 та кумуш ва 2 та бронза медали билан якунлади.