Фото: Reuters

Украина президенти Владимир Зеленский Россия президенти Владимир Путин ва АҚШ президенти Дональд Трамп билан икки ёки уч томонлама учрашувга тайёр. Бироқ бу учрашув Россия ҳудудида бўлмаслиги керак. Бу фикрларни Зеленский «ABC News» телеканалига берган интервьюсида айтиб ўтди.

«Россия томони билан икки томонлама учрашув ўтказиш мумкинми?», деган саволга жавоб берар экан, у бундан мустасно эмаслигини айтди.

«Бу президент Трампнинг сигнали эди ва мен айтдим: Жаноб президент, мен ҳар қандай учрашувга тайёрман, лекин Россияда эмас. Ҳар қандай учрашув, икки томонлама, уч томонлама, агар сиз бўлсангиз, биз хурсанд бўламиз, ҳатто йил бошида бизда ўт очишни тўхтатиш ва учрашув бўйича дастлабки шартлар бўлганди. Кейин хавфсизлик кафолатлари ҳақида гаплашдик, кейин эса учрашув», — деган Украина етакчиси.

Шу йилинг 5 сентябрь куни Россия президенти Владимир Путин Шарқий иқтисодий форумнинг ялпи мажлисида унинг Зеленский билан учрашуви учун энг яхши жой Москва эканлигини таъкидлади. Давлат раҳбари Украина раҳбари ва унинг делегацияси Россия пойтахтига ташриф буюришга қарор қилсалар, уларнинг хавфсизлигини 100 фоиз кафолатлашга тайёрлигини қўшимча қилди.

Россия тўғридан-тўғри инвестициялар жамғармаси раҳбари ва Россия президентининг хорижий давлатлар билан сармоявий ва иқтисодий ҳамкорлик бўйича махсус вакили Кирилл Дмитриевнинг айтишича, Украинадаги можарони ҳал қилиш президентлар Владимир Путин ва Дональд Трамп ўртасидаги мулоқот туфайли яқинлашиб бормоқда.

«Трамп ва Путин ўртасидаги мулоқот туфайли тинчлик яқин», деди Дмитриев.

Унинг таъкидлашича, Украинадаги можарони фақат музокаралар ва бир-бирларининг позицияларини тушуниш орқали ҳал қилиш мумкин. Россияга санкциялар қўллаш орқали босим ўтказишга уринишлар натижа бермаган.

Аввалроқ Россия етакчисининг матбуот котиби Дмитрий Песков Россия ва АҚШ президентлари Владимир Путин ва Дональд Трамп яқин орада музокараларнинг иккинчи раундини ўтказиши мумкинлигини маълум қилганди. Унинг таъкидлашича, ишчи алоқалар давом этмоқда.