Иллюстратив фото

Федерал апелляция суди прокурорнинг Италия футбол федерациясининг Туриннинг «Ювентус» клубига қарши молиявий фирибгарлик бўйича ишни қайта очиш ҳақидаги илтимосини қаноатлантирди.

Натижада жамоа Италия чемпионатининг жорий мавсумида 15 очко билан жаримага тортилди. Шу тариқа, Турин клуби А Серия турнир жадвалида учинчи ўриндан 11-ўринга тушиб кетади.

Шунингдек, клубнинг собиқ раҳбариятидан 11 нафари дисквалификация қилинди. Хусусан, клубнинг собиқ директори Фабио Паратичига 30, собиқ директор Маурицио Арривабене ва собиқ президент Андреа Анеллининг ҳар бирига 24, собиқ директорлар Паоло Гаримберти ва Павел Недвед 8 ой дисквалификация жазоси тайинланди.

Эслатиб ўтамиз, Анелли бошчилигидаги собиқ директорлар кенгаши ноябрь ойи охирида истеъфога чиққан эди.

Клуб сармоявий даромад олиш учун трансфер суммаларини оширгани учун терговга тортилган. Терговчилар клубнинг 2018-2020 йиллар учун молиявий ҳисоботини ўрганишди. Турин прокуратураси 2020 йилнинг тўрт ойлик маошлари билан боғлиқ вазиятни ҳам ўрганиб чиқди.

«Ювентус» Италия чемпионатининг 19-турида «Аталанта» билан ўз майдонида баҳс олиб боради. Учрашув 22 январь куни бўлиб ўтади.