Юртимиз шифохоналарида ЎРВИга чалинган болалар учун қўшимча 5 мингдан ортиқ ўрин-жой ташкил қилинди

19:02 26 Ноябрь 2021 Жамият
256 0

Фото: ССВ

Жорий йил октябрь ойидан бошлаб мамлакатимизда болалар ўртасида ўткир респиратор вирусли инфекцияларнинг даврий кўтарилиши кузатилаётгани сабабли тиббиёт муассасаларига мурожаатлар ва «Тез ёрдам» хизматига чақириқлар сони сезиларли даражада ортди.

Бу ҳақда Соғлиқни сақлаш вазирлиги Матбуот хизмати маълум қилди.

Шуларни инобатга олган ҳолда Соғлиқни сақлаш вазирлиги ЎРВИга чалинган бемор болаларга ўз вақтида сифатли тиббий хизмат кўрсатиш, шифохоналарда қўшимча ўрин-жойлар ташкил этиш, бу орқали тиббиёт муассасаларига тушаётган юкламаларни камайтириш бўйича зарур чоралар кўрмоқда.

Жумладан, сўнгги кунлардаги ўрганишлар натижасида Тошкент шаҳар шифохоналарида қўшимча 884 та, мамлакатимиз бўйича 5 062 та стационар ўрин-жой ташкил этилиб, 25 ноябрь ҳолатига кўра, пойтахтимиз шифохоналаридаги жами ўрин-жойлар 3 521 та, юртимиз бўйича эса қарийб 19 800 тага етказилди.

Айни пайтда Тошкент шаҳар тиббиёт муассасаларида бўш ўринлар сони 661 та, республика бўйича 4 700 тани ташкил қилмоқда.

Таққослаш учун айтсак, 2021 йил 12 ноябрь ҳолатига кўра, Тошкент шаҳар шифохоналарида ўткир респиратор вирусли инфекцияларга чалинган болалар учун 2 637 та, мамлакатимиз бўйича 14 723 та ўрин-жой бўлиб, қўшимча бўш ўринлар мавжуд бўлмаган.

Эслатиб ўтамиз, болалар ўртасида ўткир респиратор касалликларнинг даврий кўтарилиши кузатилаётгани сабабли Соғлиқни сақлаш вазирлигида ишчи гуруҳи тузилиб, 13 ноябрь тунда пойтахт шифохоналаридаги вазият ўрганилган ва ўша куннинг ўзида Тошкент шаҳар тиббиёт муассасаларида болалар учун қўшимча ўрин-жойлар ташкил этилган эди.

Тавсия этамиз

Изоҳлар

Ҳозирча ҳеч ким фикр билдирмаган. Балки Сиз биринчилардан бўларсиз?