Ботир МАДИЁРОВ/«Халқ сўзи». Ёзёвон туманида Ўзбекистон Республикаси Қуролли Кучлари ташкил этилганининг 33 йиллигига бағишланган “Янги Ўзбекистон армияси – мамлакат таянчи, халқимиз фахри!” шиори остида байрам тадбири бўлиб ўтди. Унда туман ҳокимлиги, мудофаа ишлари бўлими, ҳарбий қисм хизматчилари ҳамда кенг жамоатчилик вакиллари, нуронийлар, ёшлар иштирок этди.

Тадбирда сўзга чиққанлар барчани яқинлашиб келаётган Ватан ҳимоячилари куни байрами билан самимий қутлашди. Туман маданият бўлими ходимлари Ватанни мадҳ этувчи қўшиқлар куйлашди. Ҳарбийларнинг жанговар чиқишлари ҳамда қурол-аслаҳалар кўргазмаси намойиш этилди.

— Бундай тадбирлар ёшларда ватанпарварлик туйғусини, унга бўлган муҳаббатни ошириб, ҳарбийлик касбига қизиқиш уйғотади, — дейди меҳнат фахрийси Муҳаммадрасул Кимсанбоев. — Бугунги байрам тадбирига набираларимни ҳам олиб келдим. Улар ҳарбий либосдаги аскарларга ҳавас қилиб, келажакда Ватан ҳимоячиси бўлиш истагини билдиришди.