Гулистон шаҳар адлия бўлимининг янги биноси фойдаланишга топширилди. Ушбу муҳташам иморат фуқаролар, тадбиркорлар ҳамда ижтимоий соҳа вакилларига бир жойда ва бир вақтда кенг кўламдаги ҳуқуқий ва давлат хизматларини тақдим этиш имконини беради. Унда адлия бўлими, Юридик хизмат кўрсатиш маркази, Фуқаролик ҳолати далолатномаларини ёзиш бўлими, Давлат хизматлари маркази, шунингдек, нотариал ва ФҲДЁ архивлари фаолият юритади.

— Янги бинода фуқаролар ва тадбиркорлар учун барча шароитлар яратилган, — дейди Гулистон шаҳар адлия бўлими бошлиғи Сафарбой Тоғаев. — Хизмат кўрсатиш залида бир вақтнинг ўзида 17 та қабул ойнаси орқали 400 дан ортиқ давлат хизматлари кўрсатилади. Шунингдек, электрон навбат тизими, ахборот киоскаси, мини-кутубхона ва Wи-Фи ҳудуди, маслаҳат хизматлари ва ҳуқуқий ахборот стендлари, ногиронлиги бўлган шахслар учун мослаштирилган йўлаклар, кутиш заллари ва мобил қурилмалар учун қувватлагич жойлари, болалар майдончаси ҳам мавжуд.

Бинода келин-куёвлар учун махсус фотосуратга тушиш майдони — фотоҳудуд ташкил этилганини янгича ёндашув сифатида эътироф қилиш мумкин. Миллий анъаналар ва замонавий дизайн уйғунлашган фотоҳудудда халқимизнинг миллий қадриятлари, урф-одатлари, бой тарихимиз, ҳаққоний ўтмишимизни ифода этган яхлит композиция ҳосил қилинган.

Аҳмадали ШEРНАЗАРОВ

«Халқ сўзи»