Жаҳон бокс ассоциацияси (WBA) расман ярим ўрта вазн тоифасида жаҳон чемпиони Роландо «Ролли» Ромеро ҳамда ўзбекистонлик боксчи Шаҳрам Ғиёсов ўртасида жанг ташкил этишни буюрди. Бу ҳақда ташкилотнинг расмий сайтида хабар берилди.

Маълум қилинишича, WBA Ромеро ва Ғиёсовга келишувга эришиши учун 13 ноябргача муҳлат берган. Томонлар шу муддат ичида келишув имзоламаса, жанг шартномалари аукцион орқали ҳал этилади.

Роландо Ромеро (19 жанг, 17 ғалаба (13 нокаут) ва 2 мағлубият) жорий йил май ойида Нью-Йоркда Райан Гарсияни мағлуб этганидан сўнг WBA версияси бўйича жаҳон чемпиони бўлган. У июнь ойида, Жарон Эннисдан вазн тоифасини ўзгартирганидан кейин тўлиқ чемпион сифатида тан олинган.

Қоидага кўра, Ромеро чемпионлик камарини қўлга киритган кундан бошлаб 120 кун ичида уни ҳимоя қилиши керак эди, бу муддат эса 1 сентябрь куни якунланган. Эндиликда америкалик боксчи ушбу камар учун мажбурий даъвогар Шаҳрам Ғиёсовга қарши рингга чиқиши шарт.

Бироқ спорт нашрлари Ромеро — Пакьяо жанги ташкил этилиши эҳтимоли юқорилиги ҳақида ёзмоқда. Сабаби, филиппинлик 46 ёшли афсонавий боксчи Пакьяо жорий йил 24 январь куни Лас-Вегасда рингга қайтишини эълон қилган, аммо рақиби ҳақида маълумот бермаган эди.

Бу ўзбекистонлик боксчи яна бир бор чемпионлик жангидан қуруқ қолиши мумкинлигини англатади. Шаҳрам Ғиёсов (17 жанг, 17 ғалаба, 10 нокаут) аввалроқ ҳам чемпионлик жангида иштирок этиш имкониятидан Жарон Эннис ва Эймантас Станёнис жанги ташкил этилгани учун мосуво бўлган эди.