Николас Мадуро режимига қарши амалга оширилган АҚШ операциясидан сўнг Венесуэла мухолифати ўзининг илк расмий баёнотини эълон қилди. Баёнот мухолифат етакчиси, тинчлик бўйича Нобел мукофоти совриндори Мария Корина Мачадо номидан берилган.

Баёнотда таъкидланишича, Николос Мадуро Венесуэла халқига ҳамда бошқа давлатлар фуқароларига қарши содир этган шафқатсиз жиноятлари учун жавоб бериши шарт.

Мухолифат Мадуро инқирозга музокаралар йўли билан ечим топишдан бош тортганини, бу эса вазиятнинг зўравонлик сценарийсига олиб келганини қайд этган.

«Музокаралар орқали чиқиш йўлини қабул қилишдан бош тортилганига қарамай, Қўшма Штатлар ҳукумати қонун устуворлигини таъминлаш бўйича берган ваъдасини бажарди», — дейилади мухолифат баёнотида.

Мария Корина Мачадо ва унинг тарафдорлари мамлакат учун жавобгарликни зудлик билан ўз зиммаларига олишга тайёр эканлигини билдирган.

«Мамлакатимизда халқ ҳокимияти ва миллий суверенитетни тиклаш вақти келди. Биз тартиб ўрнатамиз, сиёсий маҳбусларни озод қиламиз, кучли давлат қурамиз ва фарзандларимизни уйга қайтарамиз», — дейди Мария Корина Мачадо.

Шунингдек у, хорижда яшаётган венесуэлаликларга алоҳида мурожаат йўлланган.

«Сизларнинг сафарбарлигингиз талаб этилади. Биз дунё ҳукуматлари ва жамоатчилигини рағбатлантириш, шунингдек, янги Венесуэлани барпо этиш бўйича кенг кўламли саъй-ҳаракатларга жалб этишни мақсад қилганмиз», — дея қўшимча қилган Мачадо.