Ўзбекистон Республикаси Қуролли Кучлари ташкил этилганлигининг 34 йиллиги ҳамда 14 январь — Ватан ҳимоячилари куни муносабати билан Сурхондарё вилоятида кенг кўламли маънавий-маърифий ва ҳарбий-ватанпарварлик тадбирлари ташкил этилмоқда.

Шу муносабат билан Узун туманидаги Давлат хавфсизлик хизмати чегара қўшинларига қарашли ҳарбий қисмлардан бирида «Халқ ва армия – бир тан, бир жон» шиори остида ватанпарварлик тадбири бўлиб ўтди.

Тадбир давомида ёшлар ҳарбий техника, қурол-аслаҳа ва ҳарбий жиҳозлар билан яқиндан танишиб, уларнинг техник имкониятлари ҳамда қўлланиш тартиби ҳақида батафсил маълумот олдилар. Шунингдек, ҳарбий хизматчилар ва уларнинг оила аъзолари учун яратилган ижтимоий шарт-шароитлар ҳақида ҳам тушунтиришлар берилди.

— Тадбир жуда қизиқарли ва таассуротларга бой бўлди, — дейди иштирокчи Сардор Абдуллаев. — Ҳарбийлар ҳаётига бўлган қизиқишим янада ортди. Бундай тадбирлар биз, ёшларни миллий армиянинг аҳамияти билан яқиндан таништириб, Ватан ҳимоясига бўлган ҳурмат ва фахр туйғуларини мустаҳкамлайди.

Қайд этилишича, бундай учрашув ва тадбирлар ёш авлодда ватанпарварлик, фидойилик ва юрт тақдирига дахлдорлик туйғуларини кучайтиришга хизмат қилмоқда.

Фарҳод ЭСОНОВ, «Халқ сўзи».