Яқин-яқинларгача Шарқий Осиё мамлакатлари чемпионатларида ўзбекистонлик футболчилар салмоғи сезиларли даражада кўпайганди. Лекин айни пайтда ушбу минтақа мамлакатларида тўп сураётган ўзбек футболчилари анча кам.

Ўз навбатида «Халқ сўзи» сайти ушбу минтақада тўп сураётган кам сонли футболчиларимиздан бири бўлган, Индонезиянинг «Персита» клуби аъзоси Жавлон Гусейнов билан интервью ташкил этди. Унда Индонезия, у ердаги футбол ва бошқа масалалар ҳақида фикр юритилди. Қуйида ушбу интервьюни мутолаа қилишингиз мумкин:

Ассалому алайкум Жавлон. Бундан анча йиллар олдин Индонезияга кўчиб ўтган эдингиз. Ушбу воқеа қандай юз берганди?

— Ассалому алайкум сизга ва сиз орқали барча ўзбек футболи мухлисларига. Ҳа, роппа-роса 6 йил олдин Индонезияга келган эдим. ОКМК клуби билан Ўзбекистон кубогини ютганимиздан сўнг, дам олаётган эдим. Шу орада менга Индонезиянинг «Борнео» клуби қизиқиб қолгани ҳақида агентлар маълумот берди. Кўп ўйлаб ўтирмасдан ушбу таклифни қабул қилдим. Чунки олдин легионер сифатида ўйнаб кўрган эдим ва бу қандай бўлишини яхши билардим.

Ушбу мамлакат чемпионати ҳақида қандай фикрдасиз? Индонезия клублари нега халқаро майдонда юқори натижа қайд эта олмаяпти?

— Фикрим, албатта, ижобий. Мамлакат футболида яхшигина ўсиш бор. Индонезия 2015 йилги FIFA чекловларидан кейин аста-секин ўз футболини тиклади.

Халқаро майдонда ҳам натижалар аста-секинлик билан келади, деган умиддаман. Сабаби, бунга клубларда ҳаракат бор. Масалан, «Персиб» клуби ОФК Чемпионлар лигаси 2 турнирида, «Дева» жамоаси эса Чақирув кубогида кейинги босқичга йўл олдилар.

Ўзбекистон Суперлигаси ва Индонезия чемпионатини солиштирсангиз, қандай фарқлар бор?

— Солиштиришни унчалик ёқтирмайман. Лекин жавоб берадиган бўлсам, албатта, Ўзбекистон Суперлигаси кучлироқ. Лекин бунга асосий сабаб — ўзбекистонлик маҳаллий футболчиларнинг даражаси ва жамоавий ўйинга эътибор қаратилиши.

Индонезияда эса асосан легионер футболчиларга ва индивидуал маҳоратга эътибор берилади. Ҳозирда Индонезия лигаси учун бир мавсумда 11 та футболчини рўйхатдан ўтказиш мумкин. Улардан 9 таси қайдномадан, 7 таси асосий таркибдан ўрин олиши мумкин. Бизда эса умумий ҳисобда клублар 6 та хорижлик футболчи олиши мумкин. Шундан ҳам билсак бўлади, Индонезияда асосий эътибор легионер футболчиларга қаратилганини.

Индонезияда легионер футболчиларга ўртача қанча маош тўланади?

— Бу ерда футболчиларга 5 минг доллардан 35 минг долларгача маош тўланади.

Сўнгги йилларда Индонезия миллий жамоасида жиддий ўсиш бор. Бу нималар билан боғлиқ?

— Асосий сабаб Индонезия футбол федерацияси кўп футболчиларни маҳаллийлаштирди. Адашмасам, Европа ва Жанубий Америкадан 15–20 нафар футболчига фуқаролик берилди. Шу сабабли натижаларда сезиларли ўзгариш бўлди.

Сизга ҳам таклиф бўлдими?

— Ҳа, лекин терма жамоа учун эмас, легионерлар лимити учун. Лекин барибир Индонезия фуқаролигини қабул қилмадим.

Муҳаммадамин Зуҳриддинов суҳбатлашди.