Одилбек Одамбоев/«Халқ сўзи». Урганч халқаро аэропорти учиш-қўниш йўлагини капитал таъмирлаш ишлари бошлангани муносабати билан жорий йилнинг 20 июль санасидан ўз фаолиятини вақтинча тўхтатган эди. Реконструкция даврида барча рейслар Нукус халқаро аэропортига йўналтирилди. Барча йўловчилар Урганчдан Нукус аэропортигача бепул транспорт қатнови йўлга қўйилди. Таъмирлаш ишлари режада белгиланганидан икки кун олдин якунланиб, аэропорт 2024 йил 5 август куни Тошкент вақти билан соат 11:00 дан яна ўз фаолиятини бошлади.

— Аэропортимиз кунига 20 га яқин рейсларни қабул қилиш, бир соатда 300 нафар йўловчига хизмат кўрсатиш имкониятига эга, — дейди Урганч халқаро аэропорти директорининг ёрдамчиси Ражаббой Отабоев. — Аэропортнинг учиш қўниш йўлаги охирги марта 1997 йилда капитал, 2018 йилда қисман таъмирланган эди. Бу йил капитал таъмирлаш жараёнига 98 та махсус техника жалб қилиниб, лойиҳада белгиланган ишлар муддатидан олдин якунланди. Эндиликда аэропортимиз «Боинг 787» ва «Аирбус А330» каби кенг фюзеляжли самолётларни чекловларсиз қабул қилади.

Урганч халқаро аэропортида яратилган бундай имкониятлар вилоятга сайёҳлар оқимини кўпайтириш, ҳудуднинг драйвери ҳисобланган туризм соҳасини янада ривожлантиришга қулай шароит яратади.